DY FJALË,.. PËR MUHO ZHUPËN

    Në Luftën Antifashiste Nacionalçlirimtare kundër okupatorëve që kishin zaptuar vendin, përveç tërë popullit të Fterrës tonë, morën pjesë në repartet partizane 45 të rinj dhe të reja. Ndërmjet tyre, në prill 1944, rrëmbeu pushkën dhe doli maleve për liri dhe bashkëfshatari ynë Muho Zhupa. Ai u radhit në Brigatën e 8-të Sulmuese, në batalionin e tretë, bashkë me Mezanin, Nevzatin, Fuatin, Lavdoshin, Sefton, Nazmiun e Naxhiun.

            Muhua kishte lindur në Fterrë në vitin 1925, babai i tij ishte Fejzo Zhupa dhe nëna Kadrie Shkurti, e cila vdiq shpejt dhe Muhua u rrit pa nënë. Megjithëse ishte vetëm 18 vjeç, tregoi trimëri të rrallë në përpjekje me armiqtë. Në luftimet e para të batalionit të tij në Sopik të Pogonit, u tregua shumë i shkathët si sulmues dhe shpartalloi shume armiq. Për trimërinë që tregoi në këtë luftim, u lavdërua para batalionit partizan.

            Komanda e ngarkoi,  bashkë me Mezan Shkurtin dhe partizanë të tjerë nga terreni, të çonin në spitalin partizan në Navaricë të Delvinës, skuadërkomandantin e tyre që ishte plagosur rëndë. I plagosuri, në momentin e fundit, siguroi edhe një palë këpucë të reja, të cilat nuk i kishte veshur asnjëherë. Kishte edhe një mushama që ja kishte dhënë edhe më parë Muhos, e tani ja fali vetë.

            Por lufta partizane kishte dhe ca ligje të rrepta, shpesh herë shumë të rënda. Komanda partizane, kur mori vesh rastin në fjalë, e konsideroi qëndrimn jo të rregullt të Muhos. Megjithëse Muhua e pranoi gabimin dhe shpjegoi, se si kishte ndodhur e vërteta, mori përsipër fajin. Duke qënë jetim nga nëna, kishte edhe ndonje boshllëk, sidomos nxitohej kur merrte vendime,  pa e menduar mirë pasojën.

            Në atë kohë lufte e në atë moment, kjo i kostoi shtrenjtë, pavarësisht se gabimi, nuk ishte faj për t’u ndëshkuar me dënim kapital. Por lufta ka dhe viktima të tilla. Edhe Muhua ishte një nga këta. 

Duke analizuar jetën dhe veprimtarinë e Muhos, mendojmë që Muhua ishte një nga djemtë partizanë të Fterrës, që fati e përfshiu në viktimat e luftës, siç ka ndodhur edhe me raste të tjera.

                                                                          Dilaver SHKURTI

                                                                                           Veteran

Nr.32 – shkurt, 2003