SHEFKI MITA – INTELEKTUALI YNË

Më 1 janar 1915 në familjen e xha Hasanit, që si shumë fteriotë të tjerë luftonte me jetën e vështirësitë ekonomike, lindi djali i dytë pas Arifit dhe para Surjait - Shefkiu. Bashkë me qumështin e nënë Xhekos iu kultivua dhe dashuria për të mësuar, për të lexuar, për të vazhduar shkollën, për t’u bërë mësues. Pasi mbaroi shkollën fillore në fshatin e lindjes, ju shtua zelli për të ecur në rrugën e dijes. Me nxitjen dhe të disa fteriotëve të tjerë që vazhduan këtë shkollë, me konkurs fitoi të drejtën për të vazhduar shkollën Normale të Elbasanit, të cilën e mbaroi me sukses në vitin 1939.

            Nga viti 1939 deri në vitin 1943 punoi arsimtar në Gusmar të Kurveleshit dhe në Borsh. Të thjeshtë e gojëëmbël, të dashur e të ndershëm, të drejtë e punëtor, të apasionuar pas violinës e mbajnë mend ish-nxënësit në Gusmar e Borsh.

            Me fillimin e Luftës Nacionalçlirimtare kundër okupatorëve fashistë, Shefkiu mori pjesë aktive në të. Bashkë me intelektualët e tjerë fteriotë, të drejtuar nga Hiqmet Dusha, u aktivizua në çetën territoriale të fshatit dhe në këshillin nacionalçlirimtar, duke dhenë kontributin e tij.

            Gjendja ekonomike në familjen e tij (kishte nënën, gruan dhe dy fëmijë), e detyroi në gjysmën e dytë të vitit 1943 të vinte në Tiranë për të siguruar trajtimin ekonomik të familjes.

            Ishte i apasionuar për gjuhë të huaja. Në këtë kohë dinte italishten, anglishten dhe fliste greqisht. Gjatë qëndrimit në Tiranë, në gusht 1944, me ndihmën e disa miqve të tij, siguroi një bursë për Austri në fakultetin e inxhinierisë navale në qytetin e Salzburgut. Studimet i mbaroi me rezultate të shkëlqyera, duke përfituar përveç profesionit edhe gjuhën gjermane.

            Në vitin 1948-1949, përmes vështirësish, arriti si emigrant në botën e ëndërruar prej tij, në SHBA, në Baltimor. Duke ju nënështruar konditave të reja ekonomike për të siguruar shpenzimet e jetesës, bëri punë të rastit dhe  kreu studimet e larta për gjuhë angleze. Duke dhenë mësim gjuhën gjermane dhe angleze në shkollë të mesme, vazhdoi studimet për doktoratë për gjuhë të huaja.

            Në vitin 1972 fitoi titullin Doktor dhe në pas Profesor. Në gazetën “Neë York Times” shkruhet “ Mister SHEFKI MITA merr titullin Doktor Profesor për gjuhë të huaja”. Shefkiu tashmë zotëronte shtatë gjuhë të huaja. Në këtë periudhë botoi edhe një libër për gramatikën shqipe. Në vitin 1975 bëri shumë përpjekje nëpërmjet ambasadës sonë për t’u kthyer në atdhe, ku kishte lënë Hanon dhe dy djemtë e tij të dashur, Dragushin dhe Sherin. Sëmundja e papritur nuk e la të realizonte gëzimin e tij për të ardhë pranë njerëzve të dashur. Nga një sëmundje e papritur u nda nga jeta në vitin 1979 në Filadelfia.

            Fteriotët kanë marrë vlera nga vlera e Fterrës sonë, gjithmonë me emër të mirë, por njëherazi edhe fteriotët i kanë dhënë vlera Fterrës, madje i kanë dhënë vlera edhe krahinës e deri në nivel kombëtar. I tillë ishte edhe Shefkiu, një bir  i Fterrës me kulturë të gjerë , prandaj dhe fteriotët e kujtojnë me respekt në këtë 20- vjetor të vdekjes së tij.

                                                                          Dilaver SHKURTI

                                                                         Vehap BEZHANI

Nr.17 – dhjetor, 1999