MËSUES SELIMI

Pas kujtimeve të ish nxënësve

            Mësues Selimi lindi në Fterrë rreth vitit 1860 dhe ka vdekur më 1936.

            Është nismëtari i çeljes së shkollës së parë shqipe të fshatit, aty nga fundi i tetorit 1916, mbasi kishte marrë pjesë në një kurs pedakogjik, ku jepte mësim Jani Minga.

            Selim Gjonika vuri në dispozicion të shkollës shtëpinë e tij dhe shkriu të gjithë mundësitë për mësimin e shkrim-këndimin dhe veprimeve arithmetike nga nxënësit. Edhe pse mjaft autoritar, me fëmijët sillej mirë, i porosiste të merrnin sa më shumë dije për të nderuar familjen dhe atdheun, kultivonte tek ata dashurinë për gjuhën amtare. Shpesh herë, në mungesë të teksteve, u tregontge ngjarje për Skënderbeun, për ngritjen e flamurit në Vlorë, për trimërinë e burrave e grave të fshatit në luftë kundër pushtuesve. Shkolla e dituria, thoshte mësues Selimi, janë lumturia e vërtetë për njeriun.

            Me punën e tij të palodhur Selim Gjonika u bë një figurë e dashur dhe e nderuar jo vetëm për nxënësit, por për gjithë fshatarët. Ai, si mësues i parë i shkollës, përkujtohet me respekt edhe sot e kësaj dite.

                                                                     Bardhyl Xhama

Nr. 2 – korrik, 1997