I THJESHTE DHE I RESPEKTUAR

I thjeshte e i respektuar, i pastër dhe i ndershëm. Këto veti jane shprehje e karakterit të tij. Lamja na kujton të jatin, xha Rushanin. Nuk thonë kot: bëmë o babë të të ngjaj!

E gjetëm të rënduar nga shëndeti. Sigurisht edhe mosha bën të vetën. Kjo vizitë u bë shkak për të "vjelur" diçka nga jeta e Lame Haxhiut.

     - Qënke mirë sot, - i thashë.   

     - Sipas moshës, jam mirë, m'u përgjigj.  

     - U bëfsh mirë e më mirë, e urova.                

            Nga biseda me të, bindesh për jetën e pastër e të vështirë të tij. Edhe padrejtësinë e ka përballuar me dinjitet.

            …Qysh kur ishte 14 vjeç mbeti jetim, i vdiq nëna. Si i madhi i fëmijve, iu bë krah babait. Jetonin larg fshatit, në Lumë, ku kishin bagëtitë dhe arat. Dhe u rritën, si u rritën.

            Në vitet e Luftës Antifashiste u aktivizua me çetën territoriale të Fterrës. Kreu dhe detyrën e korierit. Në operacionin e qershorit, së bashku me Nail Bezhanin, Nuri Mitën, Belul Brinjën, Kadri Gjonin etj. kryen detyra të ndryshme. Udhëtonte ditë e natë për të çuar letra e dokumenta që u jepte komandanti i brigatës, Jaho Gjoligu, nga Fterra në Borsh, në Kuç e Bolenë apo në fshatrat e tjera.

            Mbas çlirimit, për katër vjet shërbeu si nënoficer në Gardën e Republikës, në Sarandë, Himarë, Konispol dhe Berat. Punë të lodhëshme kishin organet e kufirit. Diti të përballonte dhe padrejtësinë që i kushtoi shumë. E akuzuan për të ashtuquajturin grup, që disa bashkëfshatarë po përgatiteshin për tu arratisur në Greqi. Për këtë e liruan dhe e dënuan katër muaj. Edhe sot që i është dhënë pafajësia, nuk e di se si e ç'farë faji ka bërë…!

            Ka punuar më vonë, për shumë vjet, në Tecin e Kombinatit të Tekstileve dhe në Ndërmarjen Kimike të Tiranës, edhe si përgjegjës edhe si specialist i kaldajave dhe enëve nën presion. Respekt meritojnë njërëz të tillë. Edhe në familje me bashkëshorten e tij Sanien, rritën, edukuan, shkolluan e martuan katër vajzat e tyre të mira, Zanën, Ferziletin, Luten dhe Albinën. Lamja, gjithnjë një familjar i mirë, një baba dhe një mik i vërtetë.

            Më 3 korrik të këtij viti, Lamja mbushi 76 vjeç. Albina dhe Shpëtimi, vajza dhe dhëndërri, që merren më biznes, i organizuan një festë të thjeshtë e të bukur familjare.

            Fterra jonë ka jo vetëm burra të dëgjuar për kulturë e dituri, por ka dhe burra e gra të thjeshtë, të ndershëm e punëtor që meritojnë të shkruajmë me respekt në gazetën "Fterra jonë" .

                                                          Feksor SHKURTI

Nr.22 – tetor,2000